أدمنت حبه ليـن عدّيـت الإدمـان

[البالود]

قصيدة جميلة , تألق فيها الشاعر في الوصف
ورسم خريطة جغرافية
وايجاز تاريخ بشر

عفيفة لأبعد الحدود
متشبعة بالمشاعر الجياشة



::::

قال الذي حده على بـدع الالحـان
واشرف على بنات فكر وندبهـا

يذب صوته زي سجّـات واذعـان
على طواريـق المعانـي سحبهـا

ويتـل قلبـه بالمعاليـق شريـان
تلّـت يميـنٍ تلهـا ثـم كربـهـا

في ساعةٍ فيها غفت كـل الأذهـان
ما حس فيها كود منهـو حسبهـا

شـوارد المعنـى ثقيـلات الأوزان
يشدهـا هاجـوس فكـرةٍ سكبهـا

شاب الورق ممـا بقلبـه ولا لان
أرها على الجـزلات حتـى كتبهـا

هي سولته ياقل مـا فيـه سلـوان
اسباب من قاد السبب في سببهـا

اللي تسبب لـي بهجـره للأعيـان
جعله وقـود النـار وأول حطبهـا

ترف الصبا عذب اللما مطرق البان
ميّاس قـد وكـم قلـوبٍ عطبهـا

سبحان من صوّر جماله وسبحـان
أنا اشهد ان اللي عطاهـا وهبهـا

لاجيت اقارنها مع البيـض شتـان
شتان مـا بيـن النـحـاس وذهبـهـا

ولا وقف رمحٍ على راس ما بـان
ولا مشى درج القطا مـا عجبهـا

ارواه ربـه والبهـا فيـه ريـان
وقام يتغطـرس بالعيـون وهبهـا

فريد جنسه ما نخلق مثلـه انسـان
كبر حـظ اللـي ولاهـا وكسبهـا

تبقى لها ذكرى على مر الازمـان
بنت الرجال اللـي رفيـعٍ نسبهـا

أدمنت حبه ليـن عدّيـت الادمـان
والارض ضاقت لو وسيع ٍرحبهـا

قـم يانديبـي بالملازيـم والشـان
حملـك ورق وانـا عليـه تعبهـا

اركب على اتقن مواريث الألمـان
بالكاش مشراها ماهي فـي طلبهـا

من وارد الناغي ماهي حوش عمّان
ياكـم عيـونٍ لا تحلـة رهبـهـا

ان قلت صانعها ماهو بنس من جان
فوق المواتر صاغها ثـم غصبهـا

ياكنها عـذرا تمـاري بالاوجـان
بالملعبه مـا حولهـا مـن هزبهـا

مـن فـوق فـل ابشـن بـيـلان
الرابح اللـي جابهـا مـن نجبهـا

تنزع من الباطن وتسري مسيـان
تهقـوي اللـي للمسافـه ركبهـا

بي إم سبع اميه وخمسين وحصان
بين المواتر ما ذكـر مـن غلبهـا

من شيشة ابن سرور ولا عبيـلان
فـوّل وقـود النـارواوزن هدبهـا

ثم تلّهـا تلـّت شفـوقٍ وحدمـان
للي هـوى بالـه تنحـى جنبهـا

لكنها دعجاً هـوة بيـن عقبـان
شيهانةٍ جاع الشها مـا رعبهـا

اسرح مساريح القطا يـم نجـران
ديرة رجـالٍ فعلهـا مـا حجبهـا

واضح محله ما يبي وصف عنوان
تلفي على اللي مـا تغـره رتبهـا

قلًه ترا ذا الخط من يم سلطـان
وانتم تحلون البلـش مـع نشبهـا

لاياعوض ياصاحبي يـا كحيـلان
أنته عوض نفسٍ تزايـد غضبهـا

أنته شبيه الذيب والذيب سرحـان
عدا على روس الطـوال ورقبهـا

تبذل يمينـك مـا تغاليـت الاثمـان
يمناً على فعـل المراجـل طربهـا

يمناك عدّة بك ورث كـم برهـان
ما جور ياعـودٍ جذبـك وجذبهـا

روسان يا جاهل عن افعال روسان
حمولةٍ مـا غـاب عنهـا شببهـا

اشكي عليك الحال من كايـنٍ كـان
عسلوجـةٍ ياشيـب قلـبٍ رغبهـا

ما نساه لو تنسى بني يام شيبـان
ولو ينقل الباطـن وعوجـاه ببهـا

ولو ينتقل لدبـي سنجـار وابـان
وبرج العرب والعين عندي عزبهـا

ولو تنكر المطران عرفا وعوجـان
والصلب والصمان واقصى هضبها

والشمري يزهد بحايـل وبـرزان
ويترك معا ميله عقب ما حضبهـا

ولو يطردون الضيف طلقين الايمان
والضيف ما يلقى القرا في عربهـا

ولو تنتقل وايل ورا ضلع شمـران
وتنزل بعرعر نـاس ماهـي شعبهـا

ولو يقطنون السيف صبيان قحطان
وتتـرك تهلاّهـا وتنـزع ودبهـا

ولو يتركون اهل الحسا كل بستـان
ويجنبـون نخيلهـا مـع رطبهـا

واهل البحر تنزح من السيف بدوان
وتارد علـى لينـه وتمـلا قربهـا

ما نساه دام الروح في وسط الابدان
مـدام روحـي ربهـا مـا سلبهـا

اخيلها مـا خايلـو غـر الامـزان
واون ونّــاتٍ تكـسـر عتبـهـا

هذا ولـك منـي تحيـه وعرفـان
يامن فناجيـل المراجـل شربيهـا


الشاعر : سلطان بن عادي

لكم مني خالص الود والتقدير